رواية مـأسـاة بـلا دمـوع !!

اول ما جلس على الكنبه بجنب امه.. طلعت منه تنهيده اليمه...
ام سعود : سلامتك.. وش فيك..؟؟
سعود وهويتذكر الشركه والهم اللي على راسه.. وكيف راح يواجه ابوه بخيانه اشرف انسان في نظره.. غير افكاره : لا.. بس تعبان من الشغل..
ام سعود : الله يقويك... تبي شئ اقولهم يسوونه لك...؟؟
سعود : لا يمه... تعبان بس.. باروح اخذ لي دش.. وان شاء الله ارتاح..
ام سعود : زين حبيبي.. عن اذنك... باروح اشوف شغلي... اليوم كله من خالتك... محمستني على هالخطبه... كأنها اول بنت عندهم تنخطب..!!
سعود حس بقشعريره لا تكون غاده راحت من يده : وش السالفه... ومنهي اللي بتنخطب..؟؟
ام سعود وهي قايمه : عفاف بنت خالتك.. جاي لها عريس.. اليوم الخطوبه رسمي...
وغابت عن نظره...
كان يحس ببرودة اطرافه... ياترى وش هالشعور اللي احس به..؟؟ وش هالاهتمام الزايد بغاده...؟؟ يمكن لاني شفتها طايحه.. وفي هاللحظه ما يقدر احد يشوفها وما يشفق عليها...!!!!
ويمكن... اوووووووووه....
قام يروح لغرفته وهو يطرد سرب الافكااار اللي بدى يغزو افكاره...
.
.
كانت مي تحاول تتصل ببنت خالتها... كانت مشتاقه لها بما انها ما صارت تجي لكليتها... فما حصل لها فرصه للسوالف...
كان الجوال يدق... لكن بدون رد...
ملت مي من تطنيش غاده لها... ورمت الجوال... ورجعت لمجلتها تتصفحها من اول وجديد...!!!

****************

اول ما دخلت من الباب... كانو كلهم محيطين بها... حتى ام يوسف كانت تحبها... كان لها حسن خلق ما فيه احد مثله...
ليلى : هلا والله بعمتي... ما بغيتي تجين...؟؟
ام فارس بابتسامه مرحه : لا افا عليك... وانا افوت علي فرحة فوفو... ما تهون والله..!!
عفاف نزلت راسها بحيا.. وكانت ريم جالسه جنبها.. بس ما علقت..
ساره بشطانه : وااااااو العرووسه مستحيه...!!! هههههه..
الكل ضحك على شكل عفاف...
ام فارس تلتفت لمرة اخوها : اقول يا ام يوسف... وين العيال...؟؟ ولا كلهم يستقبلون...!!!
ام يوسف والفرحه بعيونها : وش يستقبلووون.. لو تشوفينهم يا نوف.. تقولين ملكه مو خطوبه...!!
ام فارس : هههههههه... يا حليلهم... يوم عرس ليلى ما سوو كذا...
غاده : شفتي يا ليلى... لازم تطالبين بتعويض...!! ههههههههه..
ليلى : اكييييد... بعد ما يبي لها... هههه..
ومر اليوم عليهم... وهم فرحانين بشوفة عمتهم... اللي شوفتها ترد الروح... وسوالفها ما شاء الله كلها وناسه...

دخل يوسف للبيت... وهو على باله ان احد جاي لهم غير اهل البيت " يبيها من الله.. !!! "
يوسف واقف على المدخل : يا ولــــد....!!
ام فارس : هذا صوت يوسف.. ولا انا غلطانه...
ام يوسف : الا صوت وليدي جعلي ما اخلى منه...
غاده : ابغى افهم.. ليش يقول ياولد.. وهو يكلم حريم... !!
ليلى : تخيلي يقول " يا بنت "..!!
غاده : والله اكشخ..
ام فارس : كان ما يبقى عجوز ما قامت... على بالها ينادونها.. هههههههههههه
ليلى : هههههههههههههههههههااي...
دخل يوسف بعد ما طلعت ريم مع ساره.. دخل على صوت ضحكهم...
يوسف : السلام عليكم...
الكل رد السلام..
يوسف : الله الله.. عمتي نوف عندنا... يا مرحبا يا مرحبا..
ام فارس قامت تسلم : ههههه... الله يسلمك... وشلونك يوسف... ؟؟
يوسف : الحمد لله.. وشلونك ياعمه...؟ ووشلون العيال...؟
ام فارس : ما عليهم.. مبروك الخطوبه.. وعقبالك.. وهي تقرصه من يده...
يوسف عض شفاته : الله يبارك فيك... ( وعيونه بعيون عفاف ) وعقبالي هذي.. يبغى لها تخطيط... هههههه...
ام فارس : هههههههه... اذا على التخطيط.. فخذ راحتك...هههههههه..
عفاف اول ما قال يوسف تخطيط.. على طول تذكرت كلام العنود معها... سبحان الله ردت نفس الرد... ابتسمت... وهي تحس بنظرات يوسف لها...
غاده هي الوحيده اللي تحس ان يوسف يقصد شئ... بس ما احد انتبه له...
جلسو شوي يسولفون... وشوي شوي... العيال يدخلون... اول شئ مهند... بعدين سعد اللي يالله دخل... واخيرا بسام... اللي بالقوه قعد مع الرجال..
دخل الكل الا ابو يوسف... كان واقف مع واحد من الرجال ما بعد راح..
كان البيت كله سوالف... ونكت على عفاف...
كل شئ تكلمو فيه الا المعرس... كان اكثر شئ يهم عفاف... قالو لها عن مؤهلاته... عن اهله.. وكأنها بتتزوج منهم.. مو منه اهو..!! قالو لها على موعد الملكه.. اللي راح تكون بعد شهر بالضبط...!!!
قامت عفاف لغرفتها... وهي في داخلها تحاول تتقبل فكرة انها خطيبة واحد اسمه سامي... سااااامي.. مو عبدالعزيز...
دخلت غرفتها وسكرت الباب وراها...
طلعت كل الالم المكبوت داخلها... بدموع ساخنه... كانت تحس ان روحها بتطلع مع كل دمعه... تمالكت نفسها...
فتحت دفترها الخاص.. وسجلت هالكلمات..

" الفراق "
كم تمنيت أن تكون معي الآن..لا ليس الآن فقط.. وانما في كل لحظه.. وكل ثانيه..
أتمنى ان تكون بقربي..ولكن الآن بالذات تمنيت لو ان عيناك تلتقي بعيني.. ويداك تعانق يدي..
لم أفكر الا فيك..نسيت من حولي..لم أحس بالانظار التي تراقبني.. لم اشعر بوقع الاقدام التي من حولي.. لم اسمع الاصوات التي ملأت الفضــاء..!!
نعم..لم اكن افكر الا بانسان واحد.. هو أنــت..
على الرغم من هذا الجو الذي اعيشه الا اني احس وكأنني في غربة..في وحشة.. وان الفراق والبعاد يعصرني.. أود ان اهدم تلك الحواجز التي تبعدني عنك حتى اراك واسمع صوتك..
لم اكن اعلم ان بعدك عني سيفعل بي كل هذا..
لقد كنت اكابر نفسي واغالطها واوهمها بانك بالنسبة لها ليس الا عابر سبيل...!!
ولكن اعراض حبك ظهرت على قسمات وجهي.. شعرت بها في حنين قلبي..احسست بها في مراقبتي للايام والساعات والثواني.. حتى اراك..!!
لا ادري ماذا فعلت بي..ولماذا ظهرت في حياتي..حتى غيرت مسار خطتي التي رسمتها لعقلي وقلبي..
اسأل نفسي مئات الاسئله.. هل ستكون أنت فارس احلامي.. والبلسم لجروحي..وأنيس وحدتي.. ومالِك قلبي وسيد عقلي..
أم تراك مجرد سحابة صيف عابرة.. تزيد همومي.. وتجرح قلبي.. وتجمد عقلي.. وتنزف دمي وتهدر دموعي...!!
إني اخاف وداعك..أخشى لقاءك..
فهل لديك ما يريحني من هذا العناء والعذاب...
هل نكسر كل القيود..ونهدم كل الجواجز لنتقابل..؟؟ هل نحطم العادات والتقاليد لنلتقي..؟؟
أم انه من الافضل لكلينـــا.. أن يكون اللقاء في الدنيا الاخرى..دنيا البقاء والخلود....!!!

اول ما انتهت من الكتابه.. مسكت الورقه.. وقطعتها قطع صغيره... ونثرتها على المكتب... وقامت تطلع من غرفتها....!!!!!!

باليوم الثاني..
كانو الشباب مجتمعين بالشركه.. عشان يشوفون حل للمشكلة... وكيف ممكن لسعود انه يحل هالاشكال من عنده..
مهند : هذي ثالث مره ادق له.. ولا يرد...
يوسف : قلت لك... يتهرب.. ما صدقتني..!!
سعد : لا.. ما هو لهالدرجه...يمكن المشكله للحين قائمه.. وهو قاعد يحلها..!
يوسف : والله بكيفكم... انتو اللي قلتو بتحلونها... وورونا شطارتكم.. انا عارف من خلال شغلي الطويل.. ان هالامور ما تتعدى كونها من تخطيط شخص مهم بالشركه... او حتى المسئول الاول عنها...
مهند بتفكير : تقصد.. ان سعود يدري وقاعد يلعب علينا..؟؟!!!
يوسف : لا.. ابعد من كذا.. ليش ما هو ابوه هو اللي يعرف بكل شئ...
مهند : لا مو معقوله ان ابو سعود يلعب العاب قذره مثل هذي...!!
يوسف : وليش لا.... الفلوس تغير النفوس... وانت بلسانك قايل ان سعود انصدم اول ما قلتو له اسم الموظف... هذا وش يعني..؟؟
مهند بحيره : ما ادري..؟؟ والله احترت...!!!
بسام اللي كان حاضر معهم.. كان ساكت من بداية الحوار... وما حب يتدخل في مشكه في الاساس ما هو فاهمها...
يوسف : لا تحتار ولا شئ... ارسل له فاكس على الشركه... وحدد له وقت اذا ما انحلت المشكله.. بانحلها بطريقتنا الخاصه..!!
سعد : صعبه يا يوسف... وش هالكلام اللي قاعد تقوله..؟؟
يوسف : والله الكلام ضايع معكم.. واحدكم حقه ينوكل قدامه... وهو ساكت ما نطق بحرف..
( قام واقف ) : اطلع احسن لي... وهالمشكله انتو المسئولين عنها... واي خطأ... انتو اللي بتتحملونه...!!!!
طلع من المكتب.. وبعد شوي طلع وراه بسام... ومهند وسعد يتبادلون النظرات.. شوي وانفجرو ضحك....
سعد : ههههههههههههههههه... سمعت... احنا اللي بنتحمل..
مهند : شر البلية ما يضحك...هههههههههههههه..
.
.
اول ما وصل مكتبه... اخذ واحد من الملفات... وبدى يراجعه...
حس بدخول احد عليه... لكنه ما رفع راسه..
بسام بعد ما جلس : يوسف..
يوسف رفع راسه له : هااه.. وش تبي انت بعد..؟؟
بسام : يا اخوي لا تعصب.. باقولك رايي في الموضوع اذا تسمح..
يوسف : قل اللي عندك... وخلصني..
بسام : طيب لا تعصب...
يوسف : خلاص مانيب معصب... قل وش المطلوب..
بسام : ابغى افهم السالفه اول.. بعدين اقولك الحل اللي عندي.. وان شاء الله يرضيك...!!
يوسف تملل في كرسيه وتنهد : اااه.. وش اقولك.. السالفه وما فيها.. ان شركة رجل خالتي ابو سعود.. محاولين ابتزاز واحد من موظفينا... وماخذين ملفات.. وعقود لشركات ثانيه.. واللي احنا نبغى نعرفه... هو المسئول عن هالمشكله من شركتهم.. عشان ينال جزاءه.. وبـس..!!
بسام بعد تفكير طويل : امممم.. يعني المهم عندكم هو اللي سبب المشكله.. ماهو الاوراق والملفات...؟؟!!
يوسف بابتسامه : يا ذكي.. اذا احنا عرفناه... خلاص صار امر الملفات في يدينا... وما له أي داعي بالانكار...!!
بسام : طيب سؤال..؟؟ الحين انتو مالكم معهم أي نشاطات.. معاملات.. أي ارتباط..؟؟
يوسف : لازم بيننا ارتباطات بعقود والتزامات... لاتنسى ان لنا نفس النشاط التجاري... وهذا شئ طبيعي في عالم المال والاعمال..!!
بسام : طيب كل هالاشياء محفوظه على الحاسبات الموجوده بالشركتين.. صح..؟؟
يوسف : اكييييد...
بسام وقف وجا لعند الكرسي اللي جالس عليه يوسف : تسمح تقوم... بعد ما تفتح لي هالكمبيوتر..
يوسف باستنكار : ليش..؟ وش بتسوي..؟؟
بسام : انت قم اول.. وبعدين بتعرف كل شئ...!!
يوسف بحزم : لا.. قلي بعدين اخليك تسوي اللي تبي....
بسام اضطر يقول له : باهكر على جهازهم...!!
يوسف فاتح عيونه : نـــعــــــم..؟؟ تهكر.. لالا يا حبيبي... ما نقصنا شغل القراصنه هذا...
بسام : بكيفك...؟؟ انا عرضت عليك خدماتي وانت رفضت... وخلك على ثقه... مستحيل احد يعترف بهالجريمه... لانها بتضرهم قبل لا تنفعهم..!!
يوسف : لا والي يرحم والديك.. تضرهم.. تنفعهم.. مصير الحق يبان...
بسام وابتسامه على وجهه وهو متجه للباب بيطلع : على العموم اذا غيرت رايك انا في الخدمه...
يوسف ضحك : ههههههههه... اذا غيرته يكون خير.... ههههههه..

بالجامعه..
كانت عفاف جالسه مع العنود... مرت من جنبهم هند ووفاء... هند سلمت وجلست.. اما وفاء.. فكملت طريقها لوحده من الطاولات البعيده.. حتى من غير لا تلتفت لهم..
عفاف نزلت راسها...تحس بحرقه داخلها.. مو ذنبي اني طعت ابوي ووافقت..
العنود على طول انتبهت لحركه وفاء مع العنود.. فما حبت تلفت نظر هند فقالت : هلا بالعرايس... تصدقون احس شكلي غلط بينكم...!!
هند : هههههههه... لا عقبالك ان شاء الله الدور الجاي عليك...
العنود : لا توني صغيره.. خلوني اتمتع بشبابي..
هند : ههههههه... اقول عفاف.. وش العنود شاربه اليوم..؟؟
عفاف كانت بعالم ثاني...
العنود تهز عفاف : فوفو...
عفاف انتبهت : هلا..
هند : اللي ماخذ عقلك..
عفاف : لا بس كنت افكر.. اسفه وش كنتو تقولون..؟؟
هند : ادعي للعنود بالخبر السعيد..
العنود : فال الله ولا فالك... أي سعاده..؟؟
عفاف بمرح : السعاده الزوجيه.. الرومانسيه الحالمه...
العنود تقاطع : تكفين يا شيخه الا الرومانسيه... الجنس الخشن ما عنده أي ذرة رومانسيه..!!
عفاف : لا تعممين..
العنود : لا والله... الا الرومانسيه لانها ما توجد الا في احلام المراهقات...!!
هند : حرام عليك.. حكمك هذا ما ينجزم به...
العنود : والله هذي وجه نظري... وقولو العنود ما قالت...!!
عفاف : احلىىى يالثقه... هههههه..
هند : هههههههه..
.
.
.
كانت جالسه بعيد عنهم.. لكن عينها ما فارقتهم لحظه... كانت تستشف تعبيرات وجه عفاف من خلال كلامها... التفاتها.. ضحكتها اللي كانت اكثر شئ يقهر وفاء..
بعد ما شافت ان جلوسها ومراقبتها لهم ما له أي داعي.. غيرت نظرها عنهم.. وهي تحاول تتجاهل وجودهم بقربها....!!!
.
.
.
بعد سوالفهم وضحكهم... كانت الشله بطريقها لهم... العنود اول ما شافتهم متجهين لها.. سكتت.. خلاص كل خليه بداخلها تعطلت...
اول ما وصلو.. بتحيتهم المعتاده الخاليه من أي ملامح الاحترام.. طلبو انهم يجلسون.. او بمعنى ادق جلسو قبل لا ياخذون الاذن...
جميله وهي تكلم عفاف وبحقد واضح : مبرووك..
عفاف بتجاهل : على أيش..؟؟
هيفاء : الخبر اللي سمعناه...
فاتن : الخطوبه.. ( وانتبهت لنظرة جميله كأنها تقولها " لو سكتي احسن "
عفاف : الله يبارك فيكم..
العنود كانت ساكته ومنزله راسها.. "هروب من المواجهه"
جميله بقصد الاحراج : عقبالك العنود...
ردت عفاف بسرعه وهي تمسك يد العنود : قريب.. قريب باذن الله...!!
جميله بنظرات تشفي : كأنك واثقه...؟؟
عفاف : وليش ما اثق.. والعريس جاهز... بس ينتظر اشاره من العروس ( وتطالع العنود بابتسامه.. والعنود مو فاهمه أي شئ )
جميله وهي تغلي : اها...
فاتن : ومن سعيد الحظ..؟؟
عفاف ما ردت عليها.. لانها تدري انهم جالسين يستفزونهم...
جميله وهي شوي وتنفجر غيظ رمت كلمتها وهي واقفه : الا العنود.. ترى الصور والارقام اللي عطيتيني اياهاما ضاعت مني.. فياليت تجيبينها لي مره ثانيه...!!!!!!
العنود رفعت راسها بسرعه... تبغى تستوعب اللي قاعد يصير قدامها... وما شافت حولها الا عيون عفاف تطالعها باستفهام...!!! وكأنها تطلب شرح للي قاعد يصير...!!!
العنود في داخلها تغلي من القهر... والود ودها لو تلحق على جميله وتذبحها بيدها.. لكن مو من طبعها الانتقام ولا حتى التفكير فيه.....!!!

الجزء الثالث عشر

بعدما وصلت البيت.. كان فكرها مشدود.. ياترى عفاف انتبهت لكلام جميلوه..؟؟ طيب وش اللي فهمته منه..؟؟ لالا..مستحيل عفاف حبوبه..وماتفكر مثل تفكيرهم..بس اكيد جميله الزفته ماراح تتركني في حالي..!!! ياربي انا وش سويت حتى اتجازى كذا..؟؟ استغفر الله...استغفر الله ياربي.. وانا وش لي بهالكلام الحين..؟؟ اهي مجرد بشر لا تقدر تحل ولا تعقد..!! وكل شئ بيد ربي.. واللي ربي كاتبه لي لابد القاه مهما كان.....
انقطعت افكارها على صوت ابوها : العنود.. وش فيك وانا ابوك...؟؟
العنود ببلاهه : هااه... لا ابد يبه.. بس كنت افكر شوي..!!
ام فهد : وش تفكرين فيه بعد.. من اول يقولون.. لين تاهت البنت زوجوها..!!!
العنود انفجرت ضحك على مصطلحات امها : ههههههههههههههههه.. الله يهديك يمه وش هالكلام اللي قاعده تقولينه.. الحين شوية افكار.. تخليكم تزوجوني...!!
ابو فهد : لا افا عليك.. هذي الغاليه.. هذي درة البيت.. وما يخذها الا اللي يستاهلها..!!
العنود بفخر : احم.. شفتي يمه كذا الكلام... ماهو من الباب للطاقه.. زوجوها..!!
ام فهد بابتسامة حياء : ههههه.. اجل انتو ادرى باللي يصلح لكم...!!
العنود قامت وحبت امها على راسها : ياربي.. جعلني ما اخلا من هالوجه..
كل هالحوار كان يدور على مرأى ومسمع من مها.. اللي دلع العنود وتغليها على اهلها ما كان ابدا رايق لها...!!!
.
.
.
في البيت المجوار لبيت ابوفهد.. وبالتحديد ببيت فهد.. اللي للحين ما وصل من الدوام.. كانت الجوهره جالسه تكلم اخوها زياد بالتلفون.. وبنيتها تفاتحه بموضوع العنود.. وباين من صوتها العصبيه..
الجوهره بانفعال : وليش لا..؟؟
زياد : بس كذا مزاجي... يا اختي فكونا.. عرس ماني بمعرس لو تنطبق السما على الارض...!!
الجوهره : طيب اعرف من هي وبعدين تكلم..!!
زياد : والله لو هي ملاك ما راح اخذها.. عاجبكم هلا وسهلا ما هو عاجبكم أ....
قاطعته الجوهره باندفاع : تكفى لا تكمل.. خلاص لا تعرس... اللي يقول الحين ميتين عليك نبي نفرح فيك.. ان شاء الله عمرك ما تزوجت... وانا متعبه عمري ادور له على البنت المناسبه.. ومكلفه نفسي.. لكن الشرهه ما هي عليك.. الشرهه علي انا اللي ما طعت كلام امي وخليتك تتمرط بين بيوت الناس تدور لك على وحده تناسبك...
وقفلت الخط بوجهه حتى قبل لاتسمع رده....!!!!

*****************

طلعت من المطبخ وهي تسمع صوت زوجها جاي من برى.. واستلمته بكل انواع الاهانه والسب..
ابو معاذ بابتسامه باهته ممزوجه برعب : السلام عليكم..
ام معاذ بصوت عالي : الله لا يسلمك... الحين ما تقولي انت من متى تخبي علي سوالف اخوانك.. ووش يصير عندهم..؟؟
ابو معاذ وبصوت اقرب للهمس : اعوذ بالله... اللهم سكنهم مساكنهم..!!
ام معاذ : هاااه... وش قلت..؟؟ كني سمعتك تقول شئ.. ولا كلامي ما هو عاجبك..؟؟!!
ابو معاذ وهو يجلس قال بأسى : الا عاجبني... وليش ما يعجبني... بس ( وهو يتلفت ) ماهو وقته الحين...
ام معاذ : لا والله.. اجل متى وقته..؟؟ لا طارت الطيور بارزاقها.. جيت تقولي وش اللي صار... وتاليتها معك..!!!
ابو معاذ باستفسار : الحين ما تفهميني وش سبب هالصيحه كلها..؟؟
ام معاذ وهي تجلس : سببها الله يـ... اححح.. بس وش اقول.. انت ليه ما قلت لي عن خطبة عفاف... ولا انا ماني بقد المقام...!!!
ابو معاذ : الله يصلحك.. وش المقامات الحين..؟؟!! هذا انتي قلتيها... خطبه.. لا هي بملكه.. ولا عرس... يعني لاحقه يامره... لاحقه...!!!
ام معاذ توقف : ماعليه... هالمره وليدي الله لا يخليني منه قالي عن هالخطبه... لكن ان تكرر هالشئ... لا تلوم الا نفسك...!!!
وطلعت من الصاله... وبطريقها للمطبخ حصلت بنتها هدى واقفه.. وتتأمل وجه امها.. وبنظرات كلها الم كانت تطالع بلا شعور..
ام معاذ وهي تدزها عن قدامها : الله لا يعيدك ولا ساعتك.. انتي وهالابو النحس... الله ياخذكم وافتك من وجيهكم...!!!!
وكملت طريقها للمطبخ...وهدى واقفه منصدمه... لهالدرجه صرنا عاله على امي.. حتى صارت تدعي علينا... مو مكفيها روحتها لعمتي نصف الليل..وكذبها على ابوي يوم تقوله انها عند خالتي... و تدخلاتها في حياة عمتي و تخريبها لاستقرارها... جايه تكمل علينا احنا الحين... طلعت من قلبها تنهيده... هزت سمعها... وخلتها تدخل على ابوها وتحاول تواسيه وتهون عليه مصابه....!!!!!
كان جالس بسيارته.. ويبحث في باله على خطه مناسبه عشان يفاتح عمته بخصوص زوجها.. بعد الحقيقه اللي عرفها عنه.. ماكان له وجه حتى انه يشوفها او يتصل عليها..
الكثير من الاحداث اللي مر سعد فيها خلال الايام اللي مضت.. خلته يتلخبط... وافكاره تتشتت... عبدالعزيز اللي ما يرد عليهم.. وعفاف اللي وافقت على الزواج بسامي.. والشركه والمشكله اللي صايره فيها.. واخيرا عمته وبلاوي زوجها... ماعاد صار يعرف يجيبها من وين ولا وين...
نزل من سيارته.. دخل البيت.. وهو مقرر انه يرجع يتصل بعبدالعزيز لازم يرد عليه... ان عاجلا او اجلا..
دخل وحصل وفاء جالسه بالصاله..
سعد وهو يجلس : آآه... السلام عليكم..
وفاء ورافعه حاجب : وعليكم السلام... عسى ما شر..؟؟
سعد ويرفع سماعة التلفون : الشر ما يجيك... بس احاول اتصل على عبدالعزيز... ومايرد..
وفاء باستغراب : حتى انا حاولت ادق له... لكن نفس الشئ ما يرد علي..!!!
سعد : باحاول ادق عليه وان شاء الله يرد...
وفاء : غريبه بصراحه... وانت ما معك رقم احد من زملاءه هناك...؟؟!!
سعد : لا.. كان معي رقم واحد منهم.. لكن له فتره من رجع للسعوديه..
وفاء : يالله حاول.. يمكن يرد ويطمنا عليه...!!!
سعد : الله كريم...!!!

كان التفون في هالوقت يرن ويرن.. بدون لا احد يرد عليه... وهالشئ ازعج عبدالعزيز اللي كان توه نايم ما كمل ساعتين..
قام بتكاسل وببطء شديد وصل للسماعه وهو ما يشوف طريقه من النعاس اللي مالي راسه...
عبدالعزيز : yes
سعد بفرح ويأشر لوفاء : الو.. عبدالعزيز...
عبدالعزيز والنوم يغلبه : هلا.. مين..؟؟
سعد بمفاجأه : عزيز انا سعد وش فيك..؟؟
عبدالعزيز : هلا هلا سعد.. اعذرني حبيبي..
سعد : عزيز فيك شئ..؟؟ ربعك صاير لهم شئ...
عبدالعزيز بتفكير تذكر محمد ومشكلته وقال ماله داعي اقوله : لالا.. سلامتك مافينا شئ بس كنت نايم وصحيت على صوت التلفون...
سعد : اوووه.. آسف ازعجتك.. بس الله يهديك لك كم يوم ما ترد على اتصالاتنا..!!
عبدالعزيز بنعاس : هااه... لا والله بس انت عارف هالمرحله مهمه وتحتاج تركيز ودقه في كل شئ...
سعد : الله يقويك يا اخوي..
عبدالعزيز : وشلون امي..؟ ووفاء شخبارها...؟ سلم عليهم كثير السلام... وان شاء الله اول ما احصل فرصه بادق عليكم..
سعد : ان شاء ابشر... وانتبه لنفسك..
عبدالعزيز : لا توصي حريص.. مع السلامه..
سعد : الله يسلمك...
قفل سعد السماعه... ووفاء تطالعه بنظرات تعجب ممزوجه بخوف...
سعد : يسلم عليكم..
وفاء : الله يسلمك وياه من الشر.. وش اخباره... وليش ما يرد علينا..؟؟
سعد : يقول مشغول لانهم بنهاية السنه..وتعرفين قريب بيخلصون..
وفاء : طيب ليش ما قلت له عن عمي...... وعفاف..
سعد واقف : ماله داعي... الرجال مشغول... وماله أي لزمه اننا نقوله على شئ يسم البدن... ويهد الحيل مثل هذا...!!!!!
وطلع وترك وفاء وراه تفكر بكلامه... وبمدى منطقيته... وانه ممكن يكون هو الكلام الصح في مثل هالحالات...!!!!!!

***********************

اول ما طلعت من المدرسه.. اخذت لها دش.. وراحت تجلس بالصاله.. ما كان لها نفس أي شئ.. حتى نفسها لايعه منها.. كانت تهز رجلها بتوتر وهي تتابع واحد من البرامج الحواريه على الشاشه...
ما حست بالخطوات القريبه جدا منها... والعيون اللي ظلت فتره تتأملها.. انتبهت بس.. اول ما جلس ويده على كتفها لامها من جهه وحده...
.
كان ودها لو تبعد يده عنها.. احساسها بخيبة الامل مسيطر عليها...لكن من سابع المستحيلات ان ام فارس ترد أي من كان.. فما بالك لو كان زوجها الحبيب...
.
كان حاس فيها.. وفي برودها... وتطنيشها... وحتى مجاملتها له قدام العيال كانت واضحه وضوح الشمس... الشئ الوحيد اللي قاهره.. انها مو راضيه تقوله أي شئ... أي شئ..
.
كان مجرد قربه منها.. يزيد من ألمها... يحسسها بالخيانه.. بالغدر... بالألم.. بالقهر... بكل انواع العذاب...
.
زاد من قربه لها... مسك يدها البارده الناعمه.. بين اصابعه الرجوليه الضخمه... كان رجل بكل معنى الكلمه.. حتى ضربه كان ضرب رجال...!!! حاول يناظر بعيونها لكنها كانت مسدله نظرها للارض... رفع وجهها من ذقنها... قبل لا ينطق باي كلمه...
وبمجرد ما طاحت عينها بعينه.. فرطت منها دمعه وحيده...
كان ابو فارس مشدوه وهو يطالع الدمعه منسكبه على خدها الابيض الناعم... كان يحس ببعده عنها... وقبل لاتتكلم باي كلمه.. سحبها بهدوء... وحط راسها على صدره بحنان... وهالشئ خلى ام فارس تشد من قربه لها.. وتتمسك فيه اكثر... كانت تحس به عبدالرحمن الاولي... اول زواجهم... تحس انه رجع لها...
اول ما طاحت على صدره.. وشدة قبضتها عليه خلته يبادلها نفس التصرف.. كان يحس بدموعها الساخنه تبلله... يحس بانفاسها الحاره على كل خليه من خلاياه.. وكأن هالدموع كانت سبيل لايقاظ هالخلايا النايمه من سباااااات... كان ممكن انه يطول ويطول ويطول...
لكن بما ان الرجل هو اللي امسك بزمام المبادره... كان حق على المرأه ان تبادله الشعور... ولو لمعرفة الحقيقه الغائبه....!!!!!!

** لقد استيقظت الآن..
وخططت أن ابتعد عنك بجسدي..
ولكن روحي وعقلي سيقبعان بداخلك..
ولن تستطيع الأيام أو السنين أن تخرجها..
أتعرف لماذا فعلت ذلك..؟؟!!
ليس حباً بك بالطبع..!!
ولكن انتقاماً لقلبي أن يترك في عقلك وفكرك كل ذكرى طيبه وجميله...!!
مشكلتك الوحيده انك أخذت اكثر مما تستحق..!!
ومشكلتي انني وهبت لمثلك كل هذا الحب الصادق..!!**

غاده اتخذت القرار بعد قناعه تامه... كان لازم انها تطلع تغير جو.. وتحس بجو جديد.. وكان قرارها هذا اكبر فجيعه على عفاف بالذات... كانت عفاف تحس بقرب اختها منها...
دخلت عفاف الغرفه... وغاده جالسه ترتب آخر اغراضها بشنطتها.. وقفت تطالعها.. تقربت وجلست على السرير...
عفاف بالم : خلاص معزمه يعني..؟؟
غاده بدون لا تلتفت هزة راسها بالموافقه..
عفاف قامت و جت لعند اختها ووقفت جنبها... كان ودها لو تغير رايها... اهي الحين محتاجتها اكثر من قبل.. لكن بعد غاده محتاجه تطلع.. مجرد تقييدها بالعكاز في مشيها كان يمثل لها اكبر العراقيل..
سكرت غاده الشنطه وهي للحين منزله راسها..
عفاف : غاده... خلي بالك من نفسك..؟؟ والله العظيم بافقدك...!!!
غاده رفعت راسها وعيونها غرقانه دموع : والله حتى انا بافقدكم كلكم.. لكن كلها اسبوع وراجعه لكم.. وبيت امي ساره قريب...!!!
نزلو تحت... والخدامه وراهم شايله الشنطه...
يوسف اللي كان ينتظر غاده لانها هو اللي تكفل بتوصيلها.. طلع قبلها... وهي سلمت على امها... وطلعت... طلعت من بيتهم... متوجهه لبيت الجده.. كانت طول الطريق تفكر كيف انها انسحبت بهدوء من معركتها مع سعود... مع ان احساسها يقول انه بالعكس.. هي في الاخير اللي راح تكسب المعركه... لكن كل النتايج الحاليه ما تبشر بخير...
يوسف اول ما ركب... وبعد سوالف طويله.. كان يشوف ان الوقت مناسب عشان يفتح الموضوع اللي شغل باله وشل فكره...
يوسف : غاده..
غاده بدون لا تلتفت له : هلا..
يوسف : بغيت اسألك عن شئ... بس لا تفهميني غلط.. طيب..؟؟
غاده وبابتسامه : ولو.. قل افا عليك ما عاش اللي يفهمك غلط...!!
يوسف : هههه.. لا بس ما ادري وشلون اقوله لك... اخاف انك.....
غاده تقاطعه : لا تخاف... مهما كانت درجة خوفك... ثق ثقة عمياء اني مستحيل افكر فيك أي تفكير ممكن يغير من صورتك داخلي..
يوسف بتعجب : صورتي داخلك..؟؟
غاده واتسعت ابتسامتها : ايه... معروف ان أي انسان اذا واجهه شخص.. او سمع عنه شئ.. لابد له انه يتكون في ذهنه صوره ولو جزئيه لانطباعه تجاه هالشخص...
يوسف بدهشه من كلام غاده : والله... وش هالكلام الزين.. ما تصورت ان عندي اخت فيلسوفه..!!
غاده : كلها كلمتين وصارت فلسفه... المهم لا تضيع السالفه.. وقل وش عندك..؟؟
يوسف ضاعت ابتسامته : اها.. الموضوع بادخل فيه على طول.. بصراحه.. انا شفت وحده عندكم من اسبوع تقريبا...
وغاده مركز نظرها عليه..
يوسف كمل : لاتطالعيني كذا.. مافيها شئ النظره الاولى لك...
غاده : هههههه.. يا حليلك يا اخوي طيحتك اجل..؟؟
يوسف : مو المسأله طيحه..
غاده رافعه حاجب : اجل..؟؟
يوسف : غــاده.. الله يخليك افهميني..
غاده : وش تبغى تعرف بالضبط..؟؟
يوسف : من هي..؟؟ اسمها..؟ من بنته..؟ من العايله ولا من برى..؟؟ وشلون تعرفينها..؟؟ يعني.. والذي منه..؟؟
غاده : هههههههه.. كل هذا من النظره الاولى..؟؟ شف اذا انت ناوي بنيه طيبه.. اخبرك اللي تبي.. لكن اذا مثل كل مره اعذرني.. ما اقدر....
يوسف : وش مثل كل مره..؟؟ غاده انا هالمره من جد عازم..
غاده : زين والله.. خلاص عاد خلني ابشر امي..
يوسف : اول شئ بشريني انا يالضعيف.. وش اسمها..؟؟ اخافه يلوووع واغير رأيي..!!
غاده : لا اذا المسأله مسأله الاسم.. فمضموووون..!!
يوسف بابتسامة امل : اللي هو...
غاده تبغى تحرق اعصابه : لا حرام غيرت رأيي.. انا وحده اخاف ربي.. وما انهتك حرمات الناس..!!
يوسف فاتح عيونه : لا والله.... افتت الاخت الله يجزاها خير..!!
غاده كاتمه ضحكتها..
يوسف : يالله عاد قبل نوصل.. اعرف امي ساره.. مع احترامي الشديد.. كل شئ تبغى تعرفه..!!
غاده : ههههههههه.. ولا يهمك.. اسمها... اممم... العنووووووود.. وهي صديقه عفاف المقربه......
كانت اخر كلمه سمعها من كلام غاده.. وبعدها بدى ينسج مع خياله تركيب الاسم على المسمى...
.

مي اللي للحين ما تدري عن قرار غاده وابتعادها... كانت مشغوله بالكوشه وترتيبات الملكه اللي قايمه على اشدها.. كانت في هالوقت واقفه تنسق بعض الورود وتعدل من اماكنها اللي ما عجبها ذوق المصمم فيها..
دخلت عليها هند.. وواضح الارهاق والتعب على وجهها.. ما انتبهت لها مي اول ما جلست..
مي بعدما انتبهت : يااااه.. انتي هنا...؟؟
هند : ههههه.. ايه.. وش فيه..؟؟
مي بغرور : وش رايك بترتيبي... صح كذا احلى من اول..؟؟
هند بدون اهتمام : عادي كله واحد..!!
مي تجلس جنبها : مالت عليك.. بدل لا تقولين اختي حبيبتي.. ربي يسلمها.. تعبت نفسها وما قصرت... تقولين ( وتقلدها ) عاااادي..!!
هند : كل هذا عشان كلمه..!! ما عليه ميّونه.. والله حلو بس بالي مشغول هاليومين لا تلوميني..!!
مي : احلىىىى من قدك... ( وتفتح يدها ) كلها كم يوم وتصيرين حرم السيد ماجد.... كلوووووووولوووووووووش...هههههههههههه
وعلى صوت الزغروده دخلت ام سعود عليهم : هااه وش عنكم يا بنات... الله يديم هالضحكه..
مي وتجي لامها : يمه سؤال مهم يطرح نفسه.. وش شعورك وانتي تحتفلين بزواج اول عيالك...؟؟
ام سعود : اولا هند ما هي اول عيالي.. سعود هو الاول.. ثانيا......
سعود يقاطع امه وهو توه جاي من برى : شعورها شعور أي مواطن..!!
هند : هههههههههههه..
مي : يا ثقالة دمك..!!
سعود : خففيه...!!!
ام سعود تكلم هند : هنوده عفاف كلمتك يوم كنتي نايمه...
هند : اها.. ما عليه بكلمها ان شاء الله..
مي توقف بسرعه : يووووه... نسيت... غاده موصيتني ادق لها ضروري... ( ورفعت السماعه ) خلني ادق لها..
ام سعود : لا تكلفين عمرك.. غاده مو ببيبتهم..!!!
مي : وين راحت..؟؟
سعود كل علامات التعجب انصبت على وجهه.... وذهنه مشدود كليا مع الكلام..
ام سعود : راحت عند امي بتقعد كم يوم وتغير جو..
مي : يا سلاااااااام الخاينه تروح بدوني.. ما عليه انا اوريها..يعني ماهي حاضره الملكه..؟؟
هند : يا حلوك انتي بعد... وامي ساره.. ولا نسيتي..؟؟
مي تضرب جبهتها : اوووه تصدقون صايره انسى اشياء كثيره هالايام... الله يهديك ياهند انتي وزواجك اشغلتيني معك...!!!
هند : ههههههه... والله انتي اليوم اشك انك مي.. وش خفه الدم اللي عليك.. مدري من وين جايبتها...؟؟
مي باستهزاء : ههه.. ما يضحك... حاول مرة اخرى...!!! ( وتكلم امها ) ايه ذكرت.. طيب يمه متى بتجي امي ساره..؟؟
ام سعود : خل نشوف اول من بيجيبها... وبعدين نحدد متى..؟؟؟
سعود بهدوء : انـــــا باجيبها يمه... حددي الوقت وبلغيني..!!
.
.
.
طلعت هند من جمعة اهلها... راحت فوق عند فيصل حبيبها...
هند وتطل من الباب : نحن هنا...!! ادخل..؟
فيصل بابتسامته المعهوده : هلا حياك...
هند بعدما دخلت : اللي ماخذ عقلك يتهنى به..؟؟
فيصل : ما اكذب عليك اذا قلت لك انه اللي كنت افكر فيه هو أنــتي..!!!
هند بدهشه : أنـــــــا... اوووه من قدي...
فيصل : من جد هند بافتقدك.. احس انك ماليه علي البيت.. ومحسستني بقيمتي... ما ادري وشلون باكون من بعدك...!!!
هند : اووووف اوووف اوف...كل هذا وللحين ما صار شئ... اجل اذا تزوجت وش بتسوي...؟؟
فيصل نزل راسه : ما ادري.. ما ادري...
هند وجلست جنبه على السرير : فيصل.. انت انسان عاقل.. وكبير... واتوقع من طلعاتك اللي فاتت عرفت ان اللي تسويه خطأ.. ومن الخطأ بعد.. التمادي فيه... صــــح..؟؟
فيصل : وش اسوي... ما قدرت.. حاولت.. وما قدرت..
هند : لا تيأس.. ابحث عن العلاج... حتى لو وين كان.. سافر له.. ما انت انقص من السليمين بأي شئ..!! اوعدني يا فيصل انك تحاول تتعالج.. على الاقل ارجع لمراجعاتك.. مواعيدك.. حياتك.. امك ابوك.. اخوانك... واهم شئ اختك.. اللي تحبك كثير وتبغاك تفرح فيها...!!!
فيصل : ان شاء الله ياهند.. باحاول.. واحاول قد ما اقدر..
هند تغمزه له بعينها : اعتبره وعــــد شرف..؟؟!!!
فيصل : وعد شرف ولا يهمك...!!
هند : ههههههه.. تسلم والله.. والله يقويك.. المهم قبل لا انسى... بصراحه بغيت منك شئ مهم جدا جدا واتمنى ما تردني...!!!
فيصل : آمري عيوني لك..
هند : تسلم لي عيونك يارب... بس انا ابغاك كلك.. مو بس عيونك..!!
فيصل بتعجب : ما فهمت عليك..!!
هند : فستاني حق الملكه بيطلع اليوم... وممم.. وبصراحه ابغى اروح اجيبه.. وابغاك انت بالذات تروح معي...!!
فيصل : أنــــا...؟؟!!
هند : ايه تكفى فيصل.. تكفى.. انت عارفني ما احب اروح للسوق مع السواق لحالي.. وسعود مشغول بالشركه... وابوي نفس الشئ... يالله لا تردني..
فيصل بعد تفكير : صعبه...!!!
هند تمثل الزعل : وانا اقول اخوي حبيبي مو رادني.. بس ما عليه يجي منك اكثر...!!!
فيصل وحن قلبه عليها : لا هنوده.. لا تقولين كذا.. خلاص اذا هالشئ يرضيك مستعد اسويه... كم عروسه عندنا... ههههه...
هند استحت ونزلت راسها بحياء وهي تكتم ابتسامة الانتصااااار....!!!

ألوم معذبي فألوم نفسي****وأغصبها ويرضيها العذاب
ولو أني استطعت لتبت عنه****ولكن كيف عن روحي المتاب

"انت صــــادق...؟؟!! متأكد من كلامك...؟؟؟!!!"
كان هذا كلام ام فارس وهي مو مصدقه اللي قاعد يقوله لها سعد عن زوجها...
سعد بيأس : والله العظيم ياعمه هذا اللي عرفته من كل اللي بحثت معهم.. وسألتهم..
ام فارس وهي تحط يدها على راسها وتداري دمعاتها : سعد انت عارف خطورة هالكلام.. لالا.. مستحيل عبدالرحمن راعي هالحركات...مستحيل يخونني.. مستحييييييل... يشـــرب.. مدمن.. لاااااا ... سعد.. قل انك تكذب علي... تكفى... مستحيل اصدق...
وغاب صوتها بدموعها اللي كانت انهار على خدها...
سعد يحاول يواسي : عمتي.. انتي تقولين انه تغير... يمكن انصلح حاله... وانا والله لو اعرف انه ترك هالشغلات كنت ما قلت لك اصلا عنها...!!
ام فارس كانت تحاول تمسح دموعها : سعد.. الكلام اللي قلته لي الحين ما ابغى احد يعرف عنه أي شئ... حتى لو اخوي ابراهيم... لا يعرف أي شئ بتاتا.. عشان خاطري اترك هالسالفه بيينا... وارجوووك.. لا تخليني انــدم اني قلت لك من البدايه...!!!
سعد : ان شاء الله ياعمه... بس وشلون بتعيشين مع شخص اغلب وقته برى.. وعقله دايما غايب.. وشلون تستأمنينه على نفسك وعيالك...؟؟!!!
ام فارس : ما عليه... اللي صبرني الفتره اللي راحت يعطيني الدافع اني اصبر واصبر اكثر واستمر بالمحاوله لعل وعسى...!!!
سعد : اللي يريحك... لكن فيه سالفه وبصراحه انا مستغرب منها كثييير..
ام فارس : وش هي..؟؟؟!!
سعد : مرت عمي... ام معاذ..
ام فارس باستعجال : وش فيها بعد..؟؟
سعد : الظاهر لها علاقه باللي قاعد يصير... او على الاقل تعرف عن هالاشياء... ولها صله بناس من هالنوع...!!!
ام فارس بألم ودموعها رجعت تطيح : ياربــي... ليش..؟؟ ليش تسوي فيني كذا..؟؟ تخرب علي حياتي..؟؟ وش ذنبي..؟؟ يعني عشان فتحت لها بيتي.. واستأمنتها على اسراري..؟؟ آآآآه... حسبي الله ونعم الوكيل... حسبي الله ونعم الوكيل...!!!
سعد حس انه ما يقدر يتحمل.. ويلوم نفسه على الالم والعذاب اللي سببه لعمته بالحقيقه المرّه اللي قالها عنها... استأذن وطلع.. انسحب قبل لا يشوف اكثر من اللي شافه... وتارك ورااااااه امرأه صبووووره.. امرأه قل ان توجد في زمن الماديات والرومانسيه الحالمه.. والخيال الخصب... امرأة تراعي ربها فيما ترعاه.. تراعي زوجها في غيابه.. في حظوره... في صحته ومرضه... في غناه وفقره... في قربه.. او حتى في ابتعــــــاده.....!!!!!