& ليتـ && قلبكـ & ليــ << اول كتاباتي - الصفحة 2 - منتديات حروف العشق © عالم الأبداع والتميز

08-Jul-2006, 01:11 PM

اختي عطر اشكرك على هذا التواجد الجميل ..

اخوي ابو غاده
والله لمن شت اسمك من المتواجدين في قصتي

اني كنت انتظر ردك على قصتي .. وكلامك على عيني وراسي ..

اعذرني اذا في بدايتي اخطاء ترى منك استفيد ..^^
اشكرك اخوي وراح ابذل كل جهدي في الاستفاده من هذي الثلاث ملاحظات الهامه بالنسبه لي ..

بس ابي ردك وتفاعلك انت وباقي اخواني واخواتي في الاجزاء الجايه

اختك / سكون ...^^

08-Jul-2006, 03:39 PM

اقتباس:

المشاركة الأصلية كتبت بواسطة سكون الحب

اختي عطر اشكرك على هذا التواجد الجميل ..

اخوي ابو غاده
والله لمن شت اسمك من المتواجدين في قصتي

اني كنت انتظر ردك على قصتي .. وكلامك على عيني وراسي ..

اعذرني اذا في بدايتي اخطاء ترى منك استفيد ..^^
اشكرك اخوي وراح ابذل كل جهدي في الاستفاده من هذي الثلاث ملاحظات الهامه بالنسبه لي ..

بس ابي ردك وتفاعلك انت وباقي اخواني واخواتي في الاجزاء الجايه

اختك / سكون ...^^

أختي سكون...

ما فيه داعي للإعتذار، عن الأخطاء ، الحقيقه هذي ماهي أخطاء أنما أنا ذكرت وجهة نظري فقط لاغير، الحقيقه أنا دائماً ما احب اني اكتفي بالمدح ، فقط ولكن أفضل من الأعضاء الكرام ان يبرزوا نقاط الضعف والقوه لكي يستفيد الجميع، وأنتي يا أختي سكون قدامك المستقبل راح تتعلمين من نقدنا وراح نتعلم من مشاركاتك،

بإنتظار الأجزاء الباقيه...

تحياتي...

08-Jul-2006, 07:10 PM

اختي ليمونه
وااااااااااااااااااااااااااااااااااو
القصه روعه
خيااااااااااااااااااااااااال
صحيح انا تعبت وانا اقرا
بس ونااااااااااااسه
وانا انتظرك على احر من الجمر
انتظر الجزء الثانيه
يعطيك الف عافيه يالغاليه
نتظر الجديد

08-Jul-2006, 09:07 PM

مشكوره يا سكون الحب على القصه المثيره

وانشاء الله نستنى باقي القصه وبا التوفيق

08-Jul-2006, 10:42 PM

اخواني واخواتي اشكركم على التواجد الجميل ...

والله ياشيخه انتوا ترفعوا المعنويات ..^^

وابشروا بالجزء الجديد ..^^

08-Jul-2006, 10:53 PM

*** "" }الجــزء الثاني من القصة { "" ***

**((الفصل الاول))**

في بيت ابو سعود

العنود تتصل على بيت عمها ابو نواف لانها نست تقول ليوسف انها تبي ندى

العنود : ....الووو

خالد : ...الو

عنود : السلاام عليكم

خالد : وعليكم السلاام

عنود :انا عنود .. ممكن اكلم ندى ..؟؟

خالد : لحظه شوي ....

خالد راح عند ندى وقالها ان عنود في التلفون

ندى: اهليييييييييييييين كيييفك يالقاطعه

عنود: هلاااااااااا انا القاطعه ياحمااره ولا انتي؟...

ندى:هههههههههههه انتي ......

عنود: لا والله

عنود: اقول انتو يالخوات شريتوا شي لحفلت تخرج لمو ورهوفه وريوف ولا؟

ندى: يووووووووووه لا والله تصدقي حتى لمى ماسوت الفستان يالله انواع الذكاء هههههههه

عنود : ههههههههه الحمد لله والشكر ... طيب وش راح تساوين ....؟؟

ندى : خلاص شوفي باحاول اقنع ابوي انا نروح السوق ونشتري اقمشه بس ابي مشغل زين تعرفين لمى ودلعها ماابي هذا و ابي هذا هههههههه

عنود : ههههههههه لمى الي كذا ولا انتي . ؟ هاه هههههههههه الله يقطع ابليسك
المهم خلي المشغل علي انا عندي مشغل خطير الحين شوفي خواتك وانا باتصل على الباقين اشوف جهزوا ولا بس انا الي اتذكر كل شي خخخخخخخخ

ندى : خخخخخخخ حلوه هذي والله ...... خلاص اوكيك وبارد عليك ...يلاا باي

عنود : بايات

سكرت عنود من بنت عمها وهي تضحك عليها ....وبعدها اتصلت في بيت عمها ابو عبدالله

عنود : ..... الووو

ام عبدالله : الوو

عنود: السلااام عليكم خالتي ام عبد الله كيفك ...؟
ام عبدالله : وعليكم السلاام هلا وغلا بالعنود ... الحمد لله والله وانتي كيفك وكيف اهلك ..؟

عنود : الحمد لله الكل بخير ويسلم عليك

ام عبدالله : وينكم ماتنشافون لكم اسبوعين وبندخل بالثالث

عنود : والله ياخالتي تعرفين الاختبارات والله بس ان شاء الله نتلاقا في حفلت تخرج البنات

ام عبدالله : إي والله انك صادقه ..

عنود : خالتي رهف موجوده ..؟

ام عبدالله : إي لحظه احولك لها

في غرفت رهف رن التلفون

رهف : الووو

عنود : السلاام عليكم

رهف : هلا وغلا وعليكم السلاام

عنود : كيفك ... وكيف الدراسه ..؟

رهف : ااااااااااااه ياقلبي تعبت والله شي يزهق

عنود : ( حست برهف لانها عارفه معاناة ثالث ثنوي ) ياقلبي هانت كلها اسبوع تقريبا
وتفتكين من هذي السنه نهائيا ههههههههه

رهف : إي والله ...

عنود : رهوفه ..حظرتي فستانك ولا...؟

رهف: والله انك رااايقه ... لا مافي وقت عندي ...ياااااااااااربي شسوي

عنود : خلاص اليوم انا وندى وخواتها بنروح نشتري اقمشه الحين من العليا مول
بس اذا عمي وافق ها تجين معانا انتي واختك ؟ ولا ...

رهف : مدري اشوف امي وابوي بعدين اردلك طيب
عنود : طيب ... يلاا باي

رهف : باي

رهف راحت سالت امها الي قالت طيب و تاخذ معاها اختها وتروح مع فيصل اخوها

فيصل وتوه داخل الصاله : السلاام عليكم

ام عبد الله : وعليكم السلاام

فيصل : (راح حب راس امه ) هلا يمه كيفك ؟

ام عبدالله : بخير والحمد لله انت كيفك ؟

فيصل : بخير دامك بخير

ام عبدالله : هايا ولدي وين ابوك ؟ واخوك؟

فيصل : مدري انا خلصت شغلي بدري ورجعت

ام عبدالله : طيب دق شوفهم وين ...

فيصل : ان شاء الله ( وطلع جواله يدق على ابوه الي قاله انهم بالطريق خلهم يجهزوا الغداء)
سكر فيصل وقال لامه انهم بالطريق ام عبد الله تطلع من الصاله وراحت المطبخ تحضر الغداء ...

رهف تدخل الصاله : السلاام عليكم

فيصل : وعليكم السلاام

( رهف وفيصل قراب لبعض لان فارق بينهم موب مره كبير حتى لو 7 سنوات ما يعتبر شي)

رهف : غريبه جاي بدري اليوم ...؟

فيصل : اذا ما تبيني ارجع

رهف : لا وانا اادر ( على قولة أخوانا المصرين ) هههههه بس استغربت

فيصل : خلصت شغلي بدري ورجعت

رهف : اها

قعدوا الاخت و الاخ يتكلمون وشوي ينفتح الباب كان ابو عبد الله وعبد الله راجعين من الشغل
راحت رهف وفيصل يسلمو على ابوهم .. وشوي دخلت عليهم ام عبد الله
راح عبد الله يسلم على راس امه ..قعدوا شوي .. بعدها ام عبدالله قالت يلاا الغداء جاهز ...

ابو عبدالله : الا وين ريوفه ..؟

رهف : الحين بناديها

راحت رهف تنادي اختها الي كانت نااااااااااايمه لانها رجعت من الاختبار ونامت عكس رهف الي ارتاحت شوي وراحت تدرس لان بكره عندهم احياء
رهف : يلاا قوووووومي يادبا ..... ريوف ....ريوووووووف

ريوف : هههههههههههههم .... شتبين ( وهي حاطه المخده على راسها )

رهف : ابوي يقول قومي تغدي

ريوف : ااااااااااااااااه ابي انام ( وكان صوتها كله نوم )

رهف : يلاا عندك خمس دقايق و برجعلك و اذا ما قمتي يا ويلك

ريوف : احلفي انتي بس ... خلاص الحين بجي

رهف : ههههههههه ..يلاا ( وطلعت من غرفت اختها رايحه على غرفتها )

ريوف قامت غصب عنها و عيونها فيها النووووووووم راحت خذتلها شاور ولبست
ونزلت عند ابوها الي كان ينتظرها تحت ابو عبد الله مايحب ياكل الا لمن يشوف كل عياله معه
رهف نزلت من فوق وهي تضحك وتطالع ريوف الي كانت حاقده و تبي تنام بس نزلت
علشان ابوها ........

رهف : يبا

ابو عبدالله : لبيه

رهف : طلبتك تقول تم

ابو عبدالله : تم .... بس على وش ..؟

رهف : ابي اروح السوق انا وبنات عمي

ابو عبدالله : ليش ؟ ( عاد ابو عبد الله مايحب بناته يطلعوا الاسواق كثير ولازم قبل لا يروحوا يفتح تحقيق )

رهف : علشان فساتين التخرج ماشرينا الاقمشه ولا شي وانا وبنات عمي واختي نبي نروح وش قلت ..؟؟

ابو عبدالله : خلاص خلي فيصل يروح معاكم

فيصل: (غص بالي كان يا كله ) احم .. احم ... وليش انا

ابو عبدالله : اجل تبي السواق هو الي ياخذهم ...؟

فيصل : ( عرف ان ابوه بعد أي لحظه ممكن انه يعصب ويطلق العنان لبراكينه ) حاظر يبا

رهف : يارب يخليك لي يااحلى اب هههههههههه

فيصل : يا الشينك وانا مالي رب

ريوف : انت الله يحميك لنا يااااااارب

فيصل : ياقلبي يا هذي البنت والله اني احبك اكثر من ام اربع و اربعين هذي هههههههه

الكل الا رهف : هههههههههههههههههههههههههههه

رهف : يااااااااسخفك الله يعينك يالي ببالي ( وهي تهمس لفيصل الي قاعد قدامها )

فيصل : ومين ببالك

رهف : مالك خص

فيصل : يلاا عاد قولي

رهف : انت ادرى ( رهف كانت حاسه ان اخوها كان مخبي شي بينه وبين نفسه بس رهف ساكته)

ابو عبدالله : وش قاعدين تقولون ........؟؟

فيصل : هااه ... ولا شي يبا ( وهو يطالع اخته بحقد )

....................

08-Jul-2006, 10:59 PM

**((الفصل الثاني))**

في بيت ابو نواف توه دخل البيت مع نواف ولده

ابو نواف : السلاام عليكم

قام خالد + ندى + لمى + مها : حبوا راس ابوهم و سلمو عليه

نواف : ( راح حب راس امه وجلس ) كيفك يما

ام نواف : الحمد لله يا ولدي وانت كيفك ..؟

نواف : بخير دامك بخير

ام نواف : دوم ياولدي

شوي تدخل عليهم شيخه (وهي متغطيه)ومعها ولدها صالح الي طار على جده اول ما دخل

ابو نواف : ههههههههه صلوح حبيب مين انت

صالح ابو سنتين في حضن جده : ددي)جدي(

الكل: هههههههههههه

مها : بس تحب مين بعد جدك..؟؟

صالح : امممم ماما نوف

مها : وبعدها
صالح: ادلي تبيني اقول انتي .. بث انا احب عمي خالد

خالد : ها ها ها ها احلا فشلك

مها : لا ما فشلني ( التفتت على صالح وتساوي انها زعلت ) طيب ولا تقولي عمتي ابي حلاوه طيب ..

صالح : لا لا اثلا كنت امزح انا احبك انتي بث

خالد : افا على الخيانه ..طيب يا صلوح

صالح تعب من عمته وعمه راح عند امه وقال : اثلا انا احب امي وبس ..كذا احثن ..!!

الكل : ( يضحك على صلوح وعلى براءته ريح راسه ههههههه )

ام نواف :ههههه الله يخليك لها ...اقول يلاا قوموا الغداء جاهز

الكل قام للغداء وبعد ما خلصو غدا ندى قيد قالت لاختها على قصت الفستان
لمى ما كانت ناسيه بس قالت اخلص دراسه و اشوف كيف بس بعد الغدا فتحت الموضوع لابوها

لمى : يبا

ابو نواف : لبيه يا قلب ابوك

لمى : يسلملي قلبك ..... يبا طلبتك تقول تم

ابو نواف : تم ... بس وش تبين ؟

لمى : ابي اروح السوق انا وبنات عمي اذا ممكن

ابو نواف : ومين بيوديكم

لمى : ما دري بس عنود بيوديها اتوقع واحد من اخوانها و فطوم اتوقع انها بتكون معنا و رهف وريوف مع فيصل

ابو نواف : خلاص وانتو بيوديكم خالد

خالد ( يطالع خواته ): يبا انا باروح مع يوسف عند الشباب

ابو نواف : اي متى بتروح ...؟

خالد : بعد العشاء ان شاء الله

ابو نواف : خلاص على المغرب بتكونون هنا ...

البنات حاظر يبا
خالد حقد بس مايقدر يقول شي لابوه

خالد دق على يوسف وقاله على قصة السوق يوسف قال أي انا الحين باجيبلكم عنود
وفيصل بيجيب خواته وطلال نفس الشي ونشوف

وصلو الشباب والبنات الشباب كانو بمجلس الرجال والبنات في غرفت لمى
وهم نازلين الصاله قابلوا ام نواف و ابو نواف وسلموا عليهم ابو نواف راح عند الشباب وسلم عليهم وطلع على المزرعه الي كان متفق هو و اخوانه انهم بيروحون يشوفون المزرعه وش صار في تجديدها ....
والشباب كل واحد اخذ اخته و راحوا كلهم على السوق..طبعا لفوا نص الطابق الارضي ..

لمى : ياربي ما عجبني شي

رهف: اصبري يا بنت الحلال تونا داخلين السوق.. هذا وحنا ما كملنا نص الطابق الارضي .. ههههههههه

ريوف :هههههههههه .. لحظه شوي ايش رايكم في هذا حلو ولا ...؟ ( ريوف كان ذوقها مرررره ناعم
حتى الالوان الي اختارتها مره نعومه عليها شافت قطعه لونها زهري على بنفسجي فاتح
مدموجين ببعض ....بصراحه القطعه كانت نعومه وحلوه مره وبنفس الوقت كانت موسلين(مثل الحرير فيه لمعه حلوه).. وهذا الي خلا ريوف خلاص ما تشيل عينها عن القطعه .. سالت البنات لان هي تحب تاخذ راي الي معها)

مها : اي تدرين حلوه على لونك مررررررره

ندى : اي كيوووت القطعه

البنات كلهم قالو لريوف ان القطعه حلوه

والشباب ماشين و راهم من محل لمحل خالد يتكلم مع عيال عمه : كاننا بطاش ماطاش

الشباب : ههههههههههههههه

يوسف : اي والله من محل لمحل ....البنات طلباتهم كثيره ولا يتعبون

طلال : هههههههه تدري لو تقولهم بنتركم بالسوق وبكره بنجيكم ماراح يقولون لا

فيصل: ايه والله هههههههههه

البنات
ندى : شوفي هذي القطعه : ( كانت تكلم عنود الي كان بالها موب معاها مع قطعه عجبتها لونها عنابي وفيها قطع مطرزه بالذهبي الخفيف ...) ...... هييييييه وينك انا هنا اقولك
عنود : شوفي هذي القطعه شرايك فيها ..؟؟

ندى : أي وحده ..

عنود : هذي ( وتاشر على القطعه الي هناك على المني كان ) ها ..؟؟

ندى : واااي دمار تدرين حلوه عليك وانت كذا كنك فنيليا ههههههههههه

عنود : بسم الله علي يا غايره هههههههه

ندى : طيب شرايك في هذي

عنود : أي وحده ..؟

ندى : هذي ( وتاشر على قطعه كان لونها درجات الفوشي وفيها حجار كريمه مزينتها على شكل هادي وفخم ) ايش رايك ..؟

عنود : اي حلوه عليك ...... باقولك شي

ندى : وشو

عنود : عندك علاقه مع الفوشي شي

ندى : ههههههه ليش؟

عنود : من كنا صغار وانتي و الفوشي ودرجاته في زحمه في أي شي لازم تدخليه

ندى : مشكلتي احبه ههههههههه

عنود : ههههههههه

اما فطوم ورهف ولمى ومها الي فروا كل المحلات ولا لقوا قطع تعجبهم قعدت كل وحده تقنع اخوها علشان يروحوا سوق ثاني

الشباب وافقوا بعد ما انقطع نفس البنات المهم انهم رضوا... وراحوا كلهم على محل ثاني
لمى شافت فستان جاهز حلو بس فيه مشكله انه مره عاري وان امها ماراح توافق قعدت تدور وتدور الين لقت فستان جاهز ..كان تفته مموج بين الزيت و الكحلي وكان فيها قطع مشكوكه
يعني كان جد فخم وكان يد اي ويد لا يعني يد فيها كم مسكر بس من فوق ومن تحت مفتوح واليد الثانيه كانت كت البنات كلهم شهدولها على ذوقها الراقي والحلو لان جد الفستان مره كان حلو ...

اما فطومه ورهف ومها هم الي تبقوا ... بس راحوا على الطابق الثاني

فطومه لقت لها فستان تفاحي ارقنزا بليسي مكسر ومن جهت الصدر كان مطرز وكان في الفستان ورود صغيره لونها تفاحي مرررررره حلوه وعليه شال خفيف علشان الفستان كان شوي عاري بس هي ماتحب كذا وغير كذا هي ما شالت هم الظهر الي كان شوي باين لان شعرها البني غامق الى اخر الظهر وكان كثير فكان الوضع عندها عادي ..

وبعدها مها الي لقتلها فستان رمادي فاتح على موف ( يعني مدموجين ببعض )
وكان في من جهت الخصر على اليمين صدفه متوسطة الحجم وفيها مثل النص هلال ماسكه الفستان ومزينته
مثل الدرجات وكان الفستان شوي قصير بس موب مهم لان موب مره لان موضته يجي مقطع
بطريقه فنيه وشوي عشوائيه حلوه وكان مزين بشوي من الحجار الكريمه .... كان حلو على مها
لان هي لونها على برونزي واللون طلع عليها حلو وناعم صح انه كان شوي عاري بس
البنات كلهم ما ينخاف عليهم لان شعورهم كثيره وطويله مها كان شعرها الى نص الظهر وكثير واسود شكله حلو لانه مدرج
تبقى رهف اااااااااه من رهف الي تعبت الشباب وهي تدخل من محل لمحل ...في النهايه
فيصل كان يبي يكلم رهف الي واقفه معاها فطوم ...

فيصل : يلاا يا بنت الحلال خلصينا

فطوم : .......

فيصل : رهف اكلمك ما تسمعين ؟ ولف على الجهه الي فطوم تطالع فيها
....... فيصل انصدم لان فطوم والبنات كلهم يتنقبوا في السوق بس فطوم يعرفها من عيونها الي كان لونها اسووود وكانت كبيره وحلوه فيصل قعد يطالع في العيون الي سحرته والي دايم كانت تسحره ...... نزل فيصل راسه وقال : اسف بنت عمي كنت احسبك رهف

فطوم بحيا : ....... ح . حصل خير ...

رهف : ( كانت شايفتهم وكانت تضحك على شكل اخوها مسكين تفشل هههههههههه ) .... احم ...احم .... بغيت شي اخوي ........؟؟

فيصل : وهو يمشي من الفشيله ) أي .... يلاا اخلصي ماتبقى غيرك والشباب يبون يمشون و لاتنسين شوي وياذن المغرب ... يلاا

رهف : طيب .....

البنات كانوا يمشون في السوق الا شوي رهف تقول لفطوم : الله شوفي هذا شرايك فيه ..؟

فطوم :أي واحد ..؟

رهف : هذا ( و اخذت الفستان الي كان من ضمن الفساتين ) هااااااه شرايك ؟

فطوم : وااااااو والله حلو بس اليدين كلها برى ...؟

رهف : أي عادي بساويله شال ..... بس شرايك ..؟

فطوم : والله حلو
الفستان كان اسود ملكي ( اسود فخم ) وهو عباره عن قطعتين فوق بعض الاولى بيج و القطعه الي فوقها كانت سوده وفي جهات منها شفافه على شكل ورق شجر مع التطريز و شوية لمعه
بس الفستان كان من جد حلو لان رهف بيضه بس موب مره وشعرها اسود وكثير
والين اخر الظهر بشوي لان هي ماتحب الشعر الطويل تخيلت شكلها بهذا الفستان هي و فطوم وقالت لها فطوم : اي رهوفه الفستان جد حلو عليك .....

رهف : اممممم .... خلاص ..بشتريه

اخيرا خلصت رهف من الفستان وبعدها راحوا يشترو صنادل فخمه للفساتين ( اكرمكم الله)
لفوا المحلات كلها بس ماكان في محل زين ......فقرروا يروحوا محل ثاني يمكن يكون فيه شي زين ........ وصلوا صحارى وشروا الصنادل الفخمه كل وحده حسب لبسها حتى الي شروا اقمشه بس شروا لان مافي وقت ثاني للسوق .....وبعدها رجعوا كل واحد على بيته والشباب صلوا المغرب ...والعشاء ..و راحوا سوا على المقهى .....
.....عند الشباب .... الي كان جالس معاهم جسديا وروحه مهيب وياه كان يفكر فيها وفي عيونها
الي من زمااااااااان كانت ساكنه فيه وهو ساكت لان مايحب يقول لاحد حتى سعود ماقاله
فيصل ... الشباب كلهم استغربوا من شكله الي كان عيونه على الارض وساااااااكت
طلال : الووووووو ..... فصوووووول وين وصلت ...؟

فيصل : ... هاه ... ههههههه لا معاكم

خالد : أي معانا يبوا الشباب ...

فيصل : يارجال ماعليك مني . صدقني معاكم

سعود : لا والله

فيصل : اي والله

خالد : طيب ... وش اخر شي قلناه

فيصل: ......... الوووووو فصوووووول وين وصلت

الشباب : ههههههههههههههههههه

طلال: هههههههه لا والله معانا

فيصل: اي شفت شلون ..ههههههههههههه

طلال: ( كان حاس ان فيصل موب معاهم من زماااان موب بس الحين من يوم وصلوا المقهى وهو سرحان ......)

في جهه ثانيه كل بنت ورت امها الفستان ... وبعدها كل وحده راحت غرفتها ...
في غرفت فطوم : ( الي كانت سرحاااااااااااااانه في ولد عمها )... الله عليك يا فيصل
فطوم كانت في عالمها الي ماكان احد في غير فيصل ولا تعرف بالي بيصير في المستقبل سواء لها ولا لفيصل ..... والله كل ما شوفك مدري وش يصير فيني احس اني بعالم ثاني .. شوي ابتسمت تذكرت شكله اليوم ههههه يحليلك يا فيصل ..
ااااااااه بس لو تدري بالي فيني ...!!

بعد هذي الطلعه بكم يوم خلصوا البنات اختباراتهم وخيطت كل من ندى و عنود و ريوف فساتينهم
ريوف كانت توها راجعه من المدرسه هي واختها واول مادخلو البيت

ريوف : wo0o0o0o0o0wخلصنااااااا اختبارات ومداااااااااااارس (هي موب من طبعها الخبال مره بس اليوم غير)

وراحت الصاله الي كانت فيها امها

ام عبد الله : ههههههه الله يهيدك يابنتي

ريوف : هههههه ( وراحت حبت راس امها )

ام عبد الله : هابنتي بشري كيف الاختبار ...؟

ريوف: زين والحمد لله موب شي والله

ام عبد الله : الحمد لله ومبروك التخرج ( ودمعت عين ام عبد الله على بنتها الي كبرت )
ريوف: ( حضنت امها وباستها ) ..... يابعدي والله يا يما

وشوي دخلت عليهم رهف ....

رهف : اس .. اس اسلاااااااامو عليكو هههههه ( وراحت حبت راس امها ) شلونك يما

ام عبد الله : بخير دامكم بخير يا بنيتي ... هارهوفه شلون اختبارك ...؟

رهف: زيييييين والله اختبار مويه

ام عبد الله : مويه .......؟؟

ريوف : ههههههههه يعني سهل يما

ام عبد الله : اي قولي سهل وشو مويه ههههههههه..

رهف: ههههههه ان شاء الله

وجلسوا البنات يتكلمون مع امهم على الاختبار والحفله الي كان موعدها يوم الخميس يعني بكره ان شاء الله ...... ريوف : يما مارحت اجيب الفستان ....؟؟

ام عبد الله : خلاص خليه هناك انتي شفتي اخر مره كيف كان زين ولا ؟
ريوف : لا زين الحمد لله

ام عبد الله : خلاص اذا خليه هناك ساوي شعرك ومكياجك هناك ولبسيه مره وحده ..

ريوف: حاضر الي تامرين فيه بيصير ان شاء الله

رهف : وانا بعد ابي اروح اساوي مكياجي وشعري

ام عبد الله : خلاص ..كلنا بكره بعد صلاة العصر بنروح بيت عمكم ابو نواف تقول ام نواف نجتمع كلنا لان في كوفيره عندها وانتوا يالبنات روحوا سوا...

رهف: خلاص اجل متى قلتي بنروح..؟

ام عبد الله :بكره بعد صلاة العصر ان شاء الله

رهف طلعت من الصاله وراحت على غرفتها تكلم بنت عمها فطوم

تـــــــــرقبـــــــــــوا ... الجــــــــــزء الثــــــــــالـــــــــــث ..^^!!
ولاتحرموني من الردود ..^^ :D

09-Jul-2006, 01:09 AM

مشكوره ياقلبي ...على القصه

يالله..نننتظر الجزأء الثالث ..

لا تتاخرين تراني بموووت...بسرعه..والله لايحرمنا من جديدك

ودمتي بكل الغلا..

09-Jul-2006, 01:58 AM

09-Jul-2006, 02:30 AM

مشكوووره يالغاليه
على القصه
والله انتظر الباقي
ابي اشوف النهايه